Alay ng Mga Limot na Manananim

Ang bawat punla sa mayamang lupa
Ay tiyak na magbubunga kapag kinalinga.
Ang bawat bunga na inaani
Ay simbolo ng tagumpay na ating itatangi.

Sa piling pagkakataon
Mga bunga ay iaalay
Sa Poong Maykapal Ibabalik
Alay ay papuri.

Sa bawat pagsisikap, sa pagpatak ng pawis
Sa mga tagis ng ngipin, hirap pilit tinitikis.
Sa mga kamaong pinatigas na ng panahon
Sa mga paang kinalyo na’t inugat
Sa mga pagpupuyat sa gabing kay lamig
May inaasahang bunga
Paglasap nitong matamis na tagumpay.

Sa hanay ng mga propesyonal
Guro, doktor, nars man o pulis
Inhinyero, hukom, madre at pari
Negosyante at sundalo.
Sila ang mga limot na manananim
Nagtatanim, nagpupunla
Ng mga binhi ng karunungan at serbisyong paggawa.

Mga bunga nila ay di mahahawakan
Di ito nabibilang ngunit nakikita at nararamdaman.

Serbisyong paggawa, paglilingkod at pagkalinga
Yan ang kanilang alay sa tao, bayan at maykapal.

Mga limot na manananim, kadalasa’y di pinapansin
Patuloy na nagtatanim, lumilinang, nagpapala.
Bunga nito’y tagumpay alay sa tao, bayan at maykapal.

Ako ay isang guro
Maghapong nakatayo
Walang humpay sa pagtuturo
Mga bata sa paaralan nasa isip at puso.

O aking Diyos, Ako’y isang guro
Alay ko ang aking buhay
Kasangkapanin ninyo sa pagbuo nitong mundo.

Ako ay isang doktor, kaagapay ko ay isang nars
Oras ay gugugulin
Buhay at kalusugan sasagipin.

O aking Diyos, Ako ay isang doktor, kaagapay ay nars
Alay namin aming buhay
Kasangkapanin ninyo sa pagligtas ng mundo.

Ako ay isang hukom
Naninindigan sa tamang prinsipyo
Ipagtanggol ang mamamayan
Buhay man ay maalangan।

O aking Diyos, Ako ay isang hukom
Alay ko ang aking buhay
Kasangkapanin ninyo sa pagtatanggol ng mundo.

Kami ay mga taong simbahan, pari at madre kung kami ay turingan
Buong buhay inilaan sa ngalan ng paglilingkod sa pag-ibig sa Diyos at mananampalataya.

O aking Diyos, Kami ang inyong abang lingkod, ang Pari at Madre
Muling iniaalay aming buhay
Kasangkapanin mo sa pagbabago ng mundo.

Ako ay isang inhinyero
Kaagapay sa pagtatayo ng imprestraktura ng bayan
Kontraktor man o empleyado, inhinyero ako
Matapat sa gawain, di mandaraya.

O aking Diyos, ako ay isang inhinyero
Alay ko aking buhay
Kasangkapanin mo sa pagtatayo ng gusali ng mundo.

Ako ay isang negosyante
Naglilingkod ng may puso
Tamang sukat, tamang timbang
Handog sa mga kliyente, suki man o hinde.

O aking Diyos, ako ay isang negosyante
Alay ko aking buhay
Kasankapanin mo sa pag-unlad ng mundo.

Ako ay isang OFW
Nagsisikap magtrabaho
Kahit pamilya, isinakripisyo
Bigyang ginhawa lamang mga anak at asawa ko

O aking Diyos, ako’y isang OFW
Alay ko aking buhay
Kasangkapanin mo sa pag-angat ng buhay namin sa mundo.

Kami ay pulis at sundalo
Tapat at di tiwali
Hangad ay magtanggol
Batas ay ipatupad.

O aming Diyos, kami ay pulis at sundalo
Alay namin aming buhay
Kasangkapanin mo sa kaayusan ng mundo.

O aming Diyos, kami ang iyong mga lingkod
Bunga namin ay serbisyo
Totoo at mula sa puso
Kasangkapanin mo kami sa ikaaayos ng iyong mundo
Alay namin ay papuri, pasasalamat na walang kahulilip.

Kami ang mga Limot na Manananim
Iyong kaagapay, iyong kasangkapan
Sa paghahasik ng pag-ibig at kabutihan
Sa mundong inilaan sa mga itinatangi mong bayan.


Hrandalis
Isang Limot na Manananim